ເມື່ອບໍ່ດົນມານີ້ທາງບໍລິສັດ Apple ໄດ້ປະກາດເປີດໂຕບໍລິການ iTunes Radio ໃນງານ WWDC 2013 ຜ່ານມາ. ເຊິ່ງບໍລິການ iTunes Radio ຈະເປັນບໍລິການຟັງເພງ (ວິທະຍຸ) ອອນລາຍໂດຍອີງຕາມສະຖານີທີ່ຜູ້ໃຊ້ຈັດຂຶ້ນ.

ບໍລິການດັ່ງກ່າວໃນປະຈຸບັນໄດ້ເປີດໃຊ້ໃຫ້ນັກພັດທະນາໄດ້ນຳໃຊ້ກັນແລ້ວ ແຕ່ຫຼ້າສຸດມີລາຍງານອອກມາວ່າ Apple ອາດຈະເປີດໃຫ້ຜູ້ໃຊ້ທົ່ວໄປໃຫ້ສາມາດເຂົ້າໃຊ້ງານ iTunes Radio ໃນເດືອນໜ້ານີ້. ຢ່າງໃດກໍຕາມ, ສຳລັບຜູ້ໃຊ້ທີ່ບໍ່ໄດ້ຈ່າຍເງິນ, iTunes Radio ຈະມີໂຄສະນາຂັ້ນໃນທຸກໆ 15ນາທີ (ຕາມແຫຼ່ງຂ່າວ). ສ່ວນຜູ້ໃຊ້ທີ່ໃຊ້ບໍລິການ iTunes Match ຢູ່ແລ້ວນັ້ນ ຈະຖືວ່າເປັນຜູ້ໃຊ້ແບບຈ່າຍເງິນ ແລະ ຈະບໍ່ມີໂຄສະນາຂັ້ນໃນການຟັງເພງ.

ໃນຄວາມຄິດຂອງຜູ້ຂຽນເອງ ບໍລິການລັກສະນະນີ້ ຈະຕອບໂຈດຄົນທີ່ເບື່ອກັບການຟັງເພງທີ່ເກັບໄວ້ໃນອຸປະກອນຂອງຕົນເອງ, ເພາະເພງທີ່ iTunes Radio ເປີດນັ້ນຈະອີງຕາມນັກຮ້ອງ ຫຼືເພງທີ່ໃຊ້ສ້າງສະຖານີ. ສະນັ້ນ ມັນຈະເໝາະສົມກັບຄົນທີ່ມັກຄົ້ນຫາເພງໃຫມ່ໆ ຫຼືເພງໃນລັກສະດຽວກັນກັບເພງ ຫຼືນັກຮ້ອງທີ່ຕົນເອງມັກຢູ່ແລ້ວ.

ທີ່ມາ – Engadget