ຫຼັງຈາກທີ່ຫາເວລາໄປອ່ານກ່ຽວກັບຕົກໂນໂລຊີ eSIM ຫລືເອີ້ນເຕັມວ່າ Embeded Sim ເຊິ່ງເປັນຊິມກາດທີ່ບໍ່ມີຊິມກາດ. ເວົ້າໄປລະກໍ່ງົງ ຖ້າໃຫ້ອະທິບາຍງ່າຍໆກໍ່ຄື ມັນຄືເຕັກໂນໂລຊີຊິມກາດທີ່ຝັງມາກັບຕົວເຄື່ອງໂທລະສັບ ຫລື ອຸປະກອນຕ່າງໆທີ່ຕ້ອງການເຊື່ອມຕໍ່ກັບໂຄງຂ່າຍໂທລະຄົມ.

eSIM – ເປັນຫຍັງ ສ້າງ/ມີ eSIM?

ເຮົາອາດຈະຈື່ກັນໄດ້ໃນຍຸກທີ່ຊິມກາດຂອງເບີໂທລະສັບເລີ່ມນ້ອຍລົງຈາກຊິມທໍາມະດາ ມາເປັນ Micro Sim ແລະ ມາເປັນ Nano Sim ເຊີ່ງມັນກໍ່ຍັງເປັນຊິມທີ່ມີຂະຫນາດໃຫຍ່ຫລາຍ ໂດຍເພາະການນໍາໄປໃຊ້ກັບອຸປະກອນຂະຫນາດນ້ອຍເຊັ່ນ SmartWatch, ຫລື Smart Device ຕ່າງໆກໍ່ອາດຈະເຮັດໃຫ້ກິນເນື້ອທີ່. ຈິນຕະນາການມື້ນຶ່ງເຮົາມີ Smart Glasses ແວ່ນຕາອັດສະລິຍະ ຫລື ຫູຟັງຂະຫນາດນ້ອຍ ທີ່ສາຍລັບເຂົາມັກໃຊ້ເຊື່ອງເຂົ້າໄປໃນຫູ ທີ່ເຊື່ອມຕໍ່ 4G ໄດ້, ຖ້າຕ້ອງໃຊ້ NANO SIM ເຮົາຈະເອົາໄປສຽບໃສ່ໃສ? ສະນັ້ນ eSIM ຈຶ່ງເປັນອິຫຍັງທີ່ຕອບໂຈດທີ່ສຸດຖ້າເວົ້າເລື່ອງຂອງຂະຫນາດທີ່ນ້ອຍລົງ ເພື່ອຈະມີພື້ນທີ່ໄປເຮັດອັນອື່ນ.

ມັນບໍ່ໄດ້ມີແຕ່ເລື່ອງຂອງຂະຫນາດຂອງພື້ນທີ່ທີ່ປະຢັດໄປ ຫລື ຂະໜາດຂອງຊິມທີ່ນ້ອຍລົງ, ແຕ່ເລື່ອງຂອງການອໍານວຍຄວາມສະດວກ ແລະ ການຕໍ່ຍອດຂອງການນໍາໃຊ້ເປັນອິຫຍັງທີ່ຫລາຍຄົນອາດຈະຍັງເບິ່ງບໍ່ເຫັນ ແຕ່ໃນຄວາມຄິດເຫັນສ່ວນຕົວ, ຢໍ້າ ຄວາມຄິດເຫັນສ່ວນຕົວແລ້ວ ມັນຈະມາປ່ຽນວົງການໂທລະສັບມືຖື ແລະ ການເຊື່ອມຕໍ່ກັບອິນເຕີເນັດ ໃນໂຄງຂ່າຍໂທລະຄົມ.

ສິ່ງທີ 1: ຄວາມສະດວກສະບາຍ

ຂໍ້ດີຂອງ eSIM ກໍ່ຄືມັນເປັນຊິມກາດທີ່ໃຊ້ໄດ້ກັບເຄືອຄ່າຍມາດຕະຖານໄດ້ທົ່ວໂລກ, ສິ່ງທີ່ຕ້ອງການກໍ່ຄືການຕິດຕັ້ງ profile ຂອງບັນດາ Operator ຜູ້ໃຫ້ບໍລິການລົງໄປໃນ eSIM ແລ້ວກໍ່ເປິດໃຊ້ບໍລິການເລີຍ. ນຶກພາບຍັງບໍ່ອອກແມ່ນບໍ? ຈິນຕະນາການວ່າ eSIM ນັ້ນເປັນແອັບ Facebook, ເຊິ່ງເຮົາເອງມີຫລາຍບັນຊີ. ເມື່ອເຮົາຕ້ອງການໃຊ້ບັນຊີ A ເຮົາກໍ່ແຕ່ login ເຂົ້າບັນຊີ A. ເມື່ອເຮົາຕ້ອງການໃຊ້ບັນຊີ B ເຮົາກໍ່ແຄ່ Login ເຂົ້າບັນຊີ B ໂດຍບໍ່ຈໍາເປັນຕ້ອງລຶບ ຫລື ໂຫລດແອັບໃຫມ່. ເຊັ່ນດຽວກັນ, ເມື່ອເຮົາຢາກໄດ້ບັນຊີໃຫມ່ ເຮົາກໍ່ແຕ່ສະໝັກໃຫມ່ໂດຍໃຊ້ແອັບດຽວກັນ.

eSIM ກໍ່ເຊັ່ນດຽວກັນ ເມື່ອເຮົາເຮົາເດີນທາງໄປຕ່າງປະເທດເຮົາກໍ່ແຄ່ ເປີດເລືອກເຄືອຂ່າຍ ໂດຍບໍ່ຈໍາເປັນຕ້ອງໄປຊື້ຊິມໃຫມ່ ຫລື ປ່ຽນຊິມເຂົ້າອອກໃດໆ ໄປ 10ປະເທດ ກໍ່ແຄ່ປ່ຽນ (login ເຂົ້າປະເທດນັ້ນໆ).

ປະເທດໄທຕອນນີ້ຜູ້ໃຫ້ບໍລິການ True ແລະ AIS ກໍ່ເລີ່ມໃຫ້ບໍລິການ eSIM ແລ້ວ, ເຊິ່ງ AIS ຕອນນີ້ຮອງຮັບທັງເບີລາຍເດືອນ ແລະ ເບີເຕີມເງິນ ພ້ອມເບີສໍາລັບໄປໃຊ້ຕ່າງປະເທດ. ລອງຄລິກເບິ່ງລິ້ງນີ້ເພື່ອເບິ່ງສິທີລົງທະບຽນອັນແສນງ່າຍ https://youtu.be/R0PBiGx94-k?t=2m19s

ການລົງທະບຽນດັ່ງກ່າວເປັນພຽງການສ້າງ profile ຂອງຊິມຂຶ້ນໃນລະບົບ ແລະ ນໍາມາຕິດຕັ້ງລົງໄປໃນເຄື່ອງໂທລະສັບເທົ່ານັ້ນ. ເຊິ່ງຂອງປະເທດໄປເອງຕອນນີ້ຍັງຕ້ອງໄປຫາຈຸດໃຫ້ບໍລິການ ຈຶ່ງສາມາດລົງທະບຽນໄດ້. ແຕ່ໃນທາງເຕັກນິກແລ້ວ ສາມາດລົງອອນລາຍເອງຈາກຢູ່ບ້ານ ຫລື ຢູ່ໃສໃນໂລກນີ້ກໍ່ໄດ້ ແລ້ວຊໍາລະຄ່າບໍລິການຜ່ານບັດ Credit ຫລື Debit

ສິ່ງທີ 2: ໂລກາວິວັດ ຂອງທຸລະກິດ ໂທລະຄົມຈະເກີດຂຶ້ນ

ຈິນຕະນາການວ່າມັນງ່າຍໃຜກໍ່ສາມາດລົງທະບຽນ eSIM ເອງໄດ້ອອນລາຍ ແລະ ເລືອກຊື້ package ທີ່ຕົນເອງຕ້ອງການໄດ້ເອງເລີຍ ມັນຈະເກີດຫຍັງຂຶ້ນ? ໃນຜູ້ໃຫ້ບໍລິການ 4 ເຈົ້າໃນປະເທດລາວ ຖ້າເຈົ້າໄດ້ເຮັດໄດ້ແມ່ນຈະສາມາດສ້າງລາຍໄດ້ເພີ່ມຂຶ້ນບໍ່ຫນ້ອຍເລີຍໃນອະນາຄົດ ຖ້າ eSIM ຖືກບັນຈຸລົງໄປໃນໂທລະສັບ ຫລື ອຸປະກອນຕ່າງໆອະນາຄົດໃກ້ໆນີ້, ເພາະຜູ້ໃຊ້ທີ່ມາຈາກຕ່າງປະເທດຈະສາມາດຊື້ແລະເລືອກໃຊ້ບໍລິການຂອງບໍລິສັດເຫຼົ່ານີ້ຕັ້ງແຕ່ຍັງບໍ່ທັນເຂົ້າມາຮອດປະເທດລາວສໍ້າ ເຈົ້າໃດໃຫ້ຄວາມສະດວກກວ່າ ກໍ່ຈະມີທ່າແຮງໃນການດຶງລູກຄ້າເພີ່ມຂຶ້ນ.

ໃນປັດຈຸບັນກໍ່ເລີ່ມເຫັນ AIS ຂອງປະເທດໄທທີ່ກໍາລັງພັກດັນ eSIM ຢ່າງຮຸນແຮງ ເຊັ່ນສາມາດອອກ eSIM ໃຫ້ກັບບໍລິການປະເພດ SIM2FLY ເຊິ່ງເປັນຊິມທີ່ເອົາໄປໃຊ້ເພື່ອ ROAMING ຢູ່ຕ່າງປະເທດໃນລາຄາທີ່ບໍ່ແພງ. ສິ່ງທີ່ຂ້ອຍຄິດໃນຕອນນີ້ຄື: ສໍາລັບຂ້ອຍທີ່ໄປຕ່າງປະເທດເລື້ອຍໆ ຂ້ອຍຈະເລືອກໃຊ້ eSIM ຂອງໄທໃນການເດີນທາງຂອງຂ້ອຍ ເຊິ່ງຂ້ອຍບໍ່ຈໍາເປັນຕ້ອງໄປຊື້ຊິມ ຫລື ໄປເຕີມເງິນຢູ່ໄທກໍ່ໄດ້ AIS SIM2FLY ໃຫ້ຜູ້ໃຊ້ສາມາດເຕີມເງິນ ຫລື ຊື້ແພັກເກັດເອງໄດ້ອອນລາຍ. ເທົ່ານີ້ພຽງແຕ່ຂ້ອຍລົງຍົນ ຂ້ອຍກໍ່ມີເນັດໃຊ້ແລ້ວ. ສະນັ້ນ ມັນກໍ່ຈະເຮັດໃຫ້ໂທລະຄົມໃນປະເທດລາວເສຍໂອກາດນີ້ໄປ ເພາະ ROAMING ຂອງປະເທດລາວທີ່ຮອງຮັບອິນເຕິເນັດ ຖ້າຂ້ອຍຈື່ບໍ່ຜິດແມ່ນໄດ້ແຕ່ປະເທດໄທ ປະເທດອື່ນບາງປະເທດໄດ້ພຽງແຕ່ການໂທ. ໃນເລື່ອງຂອງການແຂ່ງຂັນທາງດ້ານລາຄາໂທລະຄົມລາວອາດບໍ່ສາມາດແຂ່ງຂັນໄດ້ໃນຕະຫລາດ ROAMING ເພາະຖ້າທຽບກັບໄທ ຖືວ່າລາຄາດີ ແລະ ສະດວກກວ່າໃນປັດຈຸບັນ.

ຈິນຕະນາການວ່າມື້ນຶ່ງ AIS ເປີດໃຫ້ໃຜກໍ່ໄດ້ສາມາດລົງທະບຽນ eSIM ເອງອອນລາຍໄດ້ ແລະຊື້ແພັກເກັດກັບບໍລິການເຂົາເຈົ້າ, ສິ່ງທີ່ຈະເກີດຂຶ້ນຄື ນອກຈາກຂາຍບໍລິການໃຫ້ກັບຄົນທີ່ເຂົ້າມາປະເທດໄທແລ້ວ AIS ຍັງຈະສາມາດຂາຍບໍລິການທີ່ເປັນ package ROAMING ໃຫ້ກັບຄົນອື່ນໆທົ່ວໂລກໄດ້ນໍາ. ໝາຍຄວາມວ່າ ທ້າວ JOHN ຈາກປະເທດອອສເຕຼເລຍ ຈະເດີນທາງໄປອາເມລິກາ ລາວບໍ່ຮູ້ຈັກປະເທດໄທ ຫລື ບໍ່ໄປປະເທດໄທເລີຍ, ກໍ່ຍັງສາມາດທີ່ຈະຂໍຊື້ package ROAMING ຂອງ AIS ເພື່ອໄປໃຊ້ໃນປະເທດອາເມລິກາໄດ້ ໂດຍຜ່ານຊ່ອງທາງອອນລາຍ.

ເປັນໄປບໍ່ໄດ້ຕິ? ເປັນໄປແລ້ວ ປັດຈຸບັນກໍ່ມີບໍລິການ ແລະ ແອັບພລິເຄຊັ່ນນຶ່ງທີ່ຊື່ວ່າ GIGSKY ໃນ APPSTORE ໃຫ້ເຮົາສາມາດ ເປີດໃຊ້ eSIM ໄດ້ເລີຍຈາກທົ່ວທຸກມູມໂລກ ໄປໃຊ້ ROAMING ໄດ້ທົ່ວທຸກມູມໂລກ. ປັດຈຸບັນຄ່າບໍລິການໂດຍສະເລ່ຍແມ່ນ Internet 1GB/$10 ສໍາລັບ ROAMING ຍົກເວັ້ນປະເທດລາວຈະຍັງແພງຢູ່ຄື 250MB / $50

ສະຫຼຸບຄື ເຫັນແລ້ວວ່າ eSIM ມັນມີບົດບາດຫລາຍກັບບັນດາ Smart Device ຕ່າງໆບໍ່ແມ່ນແຕ່ໂທລະສັບມືຖື ແລະ ກໍ່ມີແຕ່ຫວັງວ່າຈະໄດ້ໃຊ້ eSIM ຂອງທາງເຄືອຂ່າຍບ້ານເຮົາໄວໆນີ້

ຂໍຂອບໃຈ