ພໍດີມີໂອກາດໄດ້ນັ່ງເຮັດວິເຄາະຂໍ້ມູນການທ່ອງທ່ຽວປະເທດລາວ ເພາະເຫັນວ່າປີ 2024 ໄດ້ມີຈໍານວນນັກທ່ອງທ່ຽວກັບຄືນມາແລ້ວ 4,120,832ຄົນ ແລະ ທຽບໃສ່ກ່ອນ Covid-19 ໃນປີ 2019 ແມ່ນມີທັງໝົດ 4,791,065ຄົນ ແປວ່າເກືອບ 90% ແລ້ວແມ່ນການທ່ອງທ່ຽວກັບຄືນມາ ແລ້ວກໍ່ມີຄົນຮູ້ຈັກຈໍານວນນຶ່ງທີ່ເຮັດທຸລະກິດບໍລິການ ແລະ ເຄີຍໄດ້ຈາກນັກທ່ອງທ່ຽວມະຫາສານໃນຊ່ວງກ່ອນໂຄວິດ ທຸລະກິດນັ້ນໆຍັງບໍ່ມີວີແວວຈະກັບມາເລີຍ ຍ້ອນຫຍັງ? ພໍດີໄດ້ໄປຈອບເບິ່ງຂໍ້ມູນນັກທ່ອງທ່ຽວ ກໍ່ເຫັນວ່າກຸ່ມນັກທ່ອງທ່ຽວແມ່ນປ່ຽນໄປແລ້ວ ບໍ່ແມ່ນກຸ່ມເກົ່າທີ່ເຄີຍມີມາ ແລະ ເຄີຍໄດ້ກັບເຂົາຕະຫຼອດ ເຮົາມາເບິ່ງກັນເລີຍ.

ເຫັນໄດ້ເລີຍວ່າປະເທດກໍາປູເຈຍມາລາວຫຼາຍຂຶ້ນ ຖືວ່າການຮ່ວມມືລາວກໍາປູເຈຍກໍາລັງເພີ່ມທະວີຂຶ້ນ ແລະ ໂດຍສະເພາະການເພີ່ມສາຍການບິນລະວ່າງສອງປະເທດ. ນອກນັ້ນ ແມ່ນປະເທດລັດເຊຍ ແລະ ຟຣັ່ງ ກໍ່ເຊັ່ນກັນເພີ່ມຂຶ້ນຢ່າງຫນ້າຈັບຕາໄດ້ເຊັ່ນກັນ ລວມໄປເຖິງ ຄົນອາເມລິກາກໍ່ມາທ່ຽວລາວເພີ່ມຂຶ້ນຫຼາຍເຊັ່ນກັນ ອັນນີ້ອາດຈະດ້ວຍປັດໃຈທີ່ຄົນລາວສັນສາອາເມລິກາ ກັບມາຢ້ຽມຢາມບ້ານຫຼາຍຂຶ້ນຫຼັງຈາກໂຄວິດ.

ສັງເກດໄດ້ວ່າພູມລໍາເນົາຂອງນັກທ່ອງທ່ຽວທີ່ມາທ່ຽວລາວແມ່ນມີການປ່ຽນໄປຢ່າງຊັ້ນເຊີງ ເພາະເຫັນໄດ້ວ່າກຸ່ມປະເທດ ASEAN ແມ່ນມາລາວໜ້ອຍລົງ ທັ້ງໆທີ່ເປັນປີຂອງກອງປະຊຸມອາຊ່ຽນທີ່ລາວເຮົາເປັນເຈົ້າພາບດ້ວຍສໍ້າ. ນອກນັ້ນ ເຮົາຈະສັງເກດເຫັນວ່າ ທະວີບ ອາຟິກາ ຫລື ຕາເວັນອອກກາງແມ່ນມາລາວຫຼາຍຂຶ້ນ ແລະ ເຂດອາເມລິກາ ກັບ ເອີຮົບກໍ່ເຊັ່ນກັນມາຫຼາຍເພີ່ມຂຶ້ນ ຄາດການວ່າອາດຈະຍ້ອນກໍາລັງຊື້ຂອງເຂົາເຈົ້າຫຼາຍກວ່າ ຖ້າມາປະເທດລາວ ຫລື ຂົງເຂດນີ້.

ຫຼາຍຄົນອາດຈະບໍ່ເຊື່ອແມ່ນບໍ? ອາດຈະບອກວ່າ ບໍ່ແມ່ນມັນເປັນປົກກະຕິຢູ່ແລ້ວບໍ? ຄໍາຕອບຄືບໍ່ແມ່ນເລີຍ ມາເບິ່ງນໍາກັນເຮົາຈະປຽບທຽບຂອງ 2018-2019 ແລະ ເບິ່ງ 2019-2024 ນໍາກັນ ຈະເຫັນໄດ້ເລີຍວ່າ ອາເມລິກາ ແລະ ເອີຮົບແມ່ນເພີ່ມຂຶ້ນສູງຫຼາຍ ແລະ ສັງເກດວ່າກຸ່ມປະເທດ ASEAN ແມ່ນຊະລໍໂຕຕັ້ງແຕ່ປິ 2018-2019 ແລ້ວ.

ນອກຈາກນັ້ນເຮົາມາສົມທຽບກັນເບິ່ງເປັນລາຍປະເທດເລີຍ 9ລາຍການທໍາອິດແມ່ນປະເທດທີ່ເພີ່ມຂຶ້ນມາຫຼາຍໃນປີ 2019-2024 ໂດຍທຽບໃສ່ຊ່ວງປີ 2018-2019 ເຫັນວ່າຫຼາຍໆປະເທດເຕີມໂຕຢູ່ໃນເກນປົກກະຕິ ຫລື ເວົ້າອີກແບບນຶ່ງກໍ່ແມ່ນຢູ່ໃນແນວໂນ້ມຄ່ອຍໆເພີ່ມຂຶ້ນ. ແຕ່ປະເທດໄທແມ່ນເພີ່ມຂຶ້ນພຽງແຕ່ 3.7% ເທົ່ານັ້ນໃນປີ 2018-2019 ຫລື ນີ້ຈະເປັນຄວາມອີ່ມຕົວຂອງຈໍານວນນັກທ່ອງທ່ຽວຈາກໄທບໍ?​ ເພາະມາທຽບປີ 2024 ຖືວ່າຕົກໄປນັກກວ່າເກົ່າເລີຍ 43.73% ເປັນປະເທດທີ່ມີຄົນມາຈໍານວນຫຼາຍທີ່ສຸດ ທີ່ຜ່ານມາຫຼາຍປີ ແລະ ປັດຈຸບັນກໍາລັງເປັນປະເທດທີ່ກໍາລັງຫຼຸດລົງຢ່າງໄວວາ.

ສະຫຼຸບສັ້ນໆຄື ພາບນີ້ເຮັດໃຫ້ເຫັນວ່າການທ່ອງທ່ຽວລາວແມ່ນກໍາລັງປ່ຽນໄປ ຕະຫຼາດເກົ່າ ຫລື ຖານລູກຄ້າເກົ່າແມ່ນຫາຍໄປໂດຍສະເພາະປະເທດໄປຫາຍໄປ 43.73% ຫລື ລະດັບອາຊ່ຽນຫຼຸດລົງໄປ 26% ກວ່າ. ເຮັດໃຫ້ເຫັນວ່າ ຄົນທີ່ເຮັດທຸລະກິດບໍລິການຢູ່ໃນລາວຕອນນີ້ ຕ້ອງໄດ້ປັບໂຕ, ປັບປ່ຽນຫຼືຍົກລະດັບການບໍລິການ, ອາດຈະເບິ່ງຫາໄອເດຍໃຫມ່ໆໃຫ້ເໝາະກັບກຸ່ມຕະຫຼາດນີ້.​ ຂໍ້ມູນ ຫລື ປະສົບການກ່ອນໂຄວິດ 19 ອາດຈະໃຊ້ບໍໄດ້ແລ້ວ ເພາະກຸ່ມລູກຄ້າ ຫລື ກຸ່ມນັກທ່ອງທ່ຽວແມ່ນປ່ຽນໄປແລ້ວຢ່າງສິ້ນເຊີງ.

ຂໍ້ມູນອ້າງອີງຈາກສະຖິຕິນັກທ່ອງທ່ຽວ