Norton ປົກປ້ອງຕັ້ງແຕ່ມືຖືຈົນຮອດລົດຍົນ?
ໄຊແມນເທກ (Symantec) ບໍລິສັດຜູ້ພັດທະນາຊອຟົຕ໌ແວລ໌ລະບົບຮັກສາຄວາມປອດໄພເທິງຄອມພິວເຕີ ປະກາດມື້ວານນີ້ວ່າ ທາງບໍລິສັດມີແຜນຈະຂະຫຍາຍສາຍຜະລິດຕະພັນຊອຟົຕ໌ແວລ໌ ນອລ໌ຕັນ (Norton) ໄປເທິງອຸປະກອນອື່ນໆ ນອກຈາກພີຊີ ຢ່າງເຊັ່ນ ສະມາດໂຟນ ແທັບເລັດຄອມພິວເຕີ ແລະອຸປະກອນອື່ນໆ ທີ່ເຊື່ອມຕໍ່ເນັດໄດ້ ຊຶ່ງລວມເຖິງທໍລະທັດ, ລົດຍົນ ຫລືລວມກະທັ້ງກອບຮູບດິຈິຕອນ
“ເຮົາກຳລັງເຂົ້າສູ່ຍຸກໃໝ່ ຊຶ່ງເປັນຍຸກທີ່ພີຊີໄດ້ຂະຫຍາຍບົດບາດຕົວເອງເຂົ້າໄປຢູ່ໃນອຸປະກອນຕ່າງໆ ຫລວງຫລາຍ ນັ້ນເທົ່າກັບວ່າ ມັນເປັນການເພີ່ມໂອກາດໃນການເກີດອາດຊະຍາກຳຄອມພິວເຕີໄປດ້ວຍ ຜູ້ບໍລິໂພກກຳລັງສ່ຽງຕໍ່ໄພຄຸກຄາມຫລາຍກວ່າເດີມ ເຮັດໃຫ້ມີຄວາມຕ້ອງການໃນລະບົບປ້ອງກັນຫລາຍກວ່າພີຊີເທົ່ານັ້ນ” Janice Chaffin ປະທານຝ່າຍທຸລະກິດຜູ້ບໍລິໂພກຂອງໄຊແມນເທກ ກ່າວ
ສ່ວນໃຫຍ່ຜູ້ໃຊ້ຈະຮູ້ຈັກໄຊແມນ ເທກຈາກຊອຟົຕ໌ແວລ໌ນອລ໌ຕັນແອນຕີ້ໄວລັດ ແຕ່ສາມປີກວ່າທີ່ຜ່ານມາ ທາງບໍລິສັດໄດ້ໃຫ້ຄວາມສົນໃຈໄປກັບການພັດນາສະຕໍເລດຄາວດ໌ ໂປແກມຄວບຄຸມການທ່ອງເນັດຂອງເດັກນ້ອຍ ແລະລະບົບກວດສອບຊື່ສຽງຂອງແອບພິເຄຊັນທີ່ຈະດາວໂຫລດຜ່ານເນັດວ່າປອດໄພ ຫລືບໍ່? ຊຶ່ງທັງໝົດປູທາງໄປສູ່ຕະຫລາດໃໝ່ນັ້ນກໍຄື ລະບົບຮັກສາຄວາມປອດໄພເທິງອຸປະກອນຄອມພິວເຕີພົກພາ ຫລືໂມບາຍຄອມພິວຕິ້ງ ໄຊແມນເທກຕັ້ງເປົ້າໃຫ້ນອລ໌ຕັນສາມາດປົກປ້ອງອຸປະກອນໄດ້ແທບທຸກຊະນິດ ໂດຍເອີ້ນມັນວ່າ “Norton Everywhere” ຊຶ່ງມີໄອເດຍທີ່ໜ້າສົນໃຈດັ່ງນີ້
Norton Everywhere ຈະເປັນຫລາຍກວ່າແອນຕີ້ໄວລັດ ຊຶ່ງລວມເຖິງການປົກປ້ອງເຫລົ່າບັນດາສະມາດໂຟນ (iPhone ແລະ Android 2.0 ຂຶ້ນໄປ) ໂດຍນອລ໌ຕັນຈະຊ່ວຍເບິ່ງແຍງອຸປະກອນດ້ວຍ ນອກຈາກປ້ອງກັນແອບຯບໍ່ຫວັງດີ ແລະມັນແວລ໌ຕ່າງໆ ແລ້ວ ຢ່າງເຊັ່ນ ຜູ້ໃຊ້ສາມາດໃຊ້ແອບຯ ສັ່ງລັອກມືຖື ຫລືລົບຂໍ້ມູນໃນເຄື່ອງຜ່ານເນັດ ຫາກມືຖືຖືກລັກ ຫລືສູນຫາຍ ບໍ່ຮັບສາຍຮຽກທີ່ບໍ່ຕ້ອງການ ຫລືແມ່ນແຕ່ສະຖານະ ການ Roaming ເພື່ອຫລີກລ້ຽງການຖືກຊາລ໌ຈ ເປັນຕົ້ນ
ນອກຈາກນີ້ ໃນສ່ວນຂອງ Norton Connect App ຈະຊ່ວຍໃຫ້ຜູ້ໃຊ້ສາມາດຊິງຄ໌ຂໍ້ມູນກັບແບັກອັບທີ່ຢູ່ເທິງເນັດ (Norton 360 ຫລື Norton Online Backup) ເພື່ອເຂົ້າເຖິງ ຈັດການ ແລະແບ່ງປັນໄຟລ໌ຕ່າງໆ ໂດຍກົງຈາກໄອໂຟນ ຫລືແອນດລອຍດ໌ ຍິ່ງໄປກວ່ານັ້ນ Norton Everywhere ຍັງຄອບຄຸມລະບົບຮັກສາຄວາມປອດໄພຫລາຍກວ່າມືຖື ອີກດ້ວຍ ອຸປະກອນຢ່າງເຊັ່ນ ກອບຮູບດິຈິຕອນທີເຊື່ອມຕໍ່ເນັດໄດ້ກໍຍັງຕ້ອງການລະບົບຮັກສາຄວາມປອດໄພ ບໍ່ໜ້າເຊື່ອເເມ່ນບໍ່ ແຕ່ຂໍ້ເທັດຈິງທີຄວນຮູ້ກໍຄື ອຸປະກອນໃດໆ ກໍຕາມທີ່ເຊື່ອມຕໍ່ເນັດໄດ້ ທຸກຢ່າງສ່ຽງຕໍ່ຄວາມບໍ່ປອດໄພທັງສິ້ນ Norton ຈະສາມາດປ້ອງກັນເຄື່ອງຫລິ້ນ Blu-ray ທໍລະທັດ ເຄື່ອງຫລິ້ນເກມ ແທັບເລັດພີຊີ ອີລີດເດີລ໌ ຫລືແມ່ນແຕ່ລົດຍົນຂອງເຈົ້າໃຫ້ລອດພົ້ນຈາກໄພຄຸກຄາມທີ່ຜ່ານມາທາງເນັດໄດ້
ຍັງບໍ່ໝົດເທົ່ານີ້ ເພາະການກອງຄອນເທັນຕ໌ທີ່ບໍ່ເໝາະສົມສຳລັບເດັກ ຫລືໄພຄຸກຄາມທີ່ຢູ່ເທິງພີຊີພຽງຢ່າງດຽວຍັງບໍ່ພຽງພໍ ເພາະມື້ນີ້ເດັກນ້ອຍ ສາມາດເຂົ້າເຖິງອິນເຕີເນັດໄດ້ຈາກມືຖື ຫລືແມ່ນແຕ່ເຄື່ອງຫລິ້ນວິດີໂອເກມກໍໄດ້ ເມື່ອເປັນເຊັ່ນນີ້ Norton ໄດ້ເຊື່ອມຕໍ່ຖານຂໍ້ມູນ ແລະໂຄງສ້າງພື້ນຖານ ເພື່ອໃຫ້ບໍລິການກັບ DNS (Domain Name System) ທີ່ສື່ສານກັບອຸປະກອນຕ່າງໆ ທີເຊື່ອມຕໍ່ເຂົ້າສູ່ເນັດ ຜູ້ໃຊ້ທີ່ເປັນຜູ້ປົກຄອງສາມາດປ້ອງກັນເດັກໆ ຈາກເວັບໄຊຕ໌ທີ່ບໍ່ເໝາະສົມໄດ້ ແມ່ນເດັກໆ ຈະທ່ອງເວັບດ້ວຍເຄື່ອງຫລິ້ນເກມ Wii ຫລືປົກປ້ອງເຄືອຂ່າຍຈາກໄວລັດທີ່ມາກັບໄອແພດຂອງຜູ້ໃຊ້ທົ່ວໄປໄດ້ Norton DNS ຈະແຈກຟຣີເພື່ອຍົກລະດັບຮັກສາຄວາມປອດໄພດ້ວຍການທວນສອບທຸກ URL ທີ່ທ່ານເຂົ້າໄປຢ້ຽມຊົມ
ແລະແທນທີ່ຜູ້ໃຊ້ຈະຕ້ອງດາວນ໌ໂຫລດ Norton ໄຊແມນເທກຕັ້ງເປົ້າທີ່ຈະໃຫ້ບໍລິການດາວໂຫລດໄດ້ໂດຍກົງຜ່ານຄູ່ຄ້າອຸປະກອນຄອນຊູເມີລ໌ ອິເລັກໂຕນິກ ທີ່ເປັນພັນທະມິດດ້ວຍຢ່າງເຊັ່ນ HTC ເປັນຕົ້ນ ໄຊແມນເທກຄາດວ່າ ຈະອອກ Norton Everywhere ເວີລ໌ຊັນທົດສອບທີສາມາດປົກປ້ອງອຸປະກອນໄດ້ຫລາກຫລາຍໃນຊ່ວງໄຕມາດທີ່ສາມຂອງປີ ນີ້
ຂໍ້ມູນຈາກ:Arip.co.th