Apple ໂຊຜົນປະກອບການໄຕມາດລ່າສຸດ ດີເກີນທີ່ຄາດໄວ້
ຈາກທີ່ຄາດການ ກັນໄວ້ວ່າຕົວເລກຂາຍໄດ້ຂອງແອບເປີນຈະເພີ່ມຂຶ້ນສອງເທົ່າ ຜົນທີ່ອອກມາກໍບໍ່ເຮັດໃຫ້ກອງເຊຍຜິດຫວັງເພາະມັນດີຍິ່ງກວ່າທີ່ຄາດການໄວ້ອີກ! ໂດຍແອບເປີນຖະແຫລງຜົນປະກອບການໄຕມາດທີ່3 (ຕາມວິທີການນັບໄຕມາດຂອງບໍລິສັດ) ມີລາຍລະອຽດທາງການເງີນດັ່ງນີ້
- ຍອດຂາຍລວມ 15.7 ພັນລ້ານຫລຽນຯ ເພີ່ມຂຶ້ນ 61% ທຽບກັບໄຕມາດດຽວກັນໃນປີທີ່ແລ້ວ
- ກຳໄລສຸດທິ 3.35 ພັນລ້ານຫລຽນຯ ຄິດເປັນ 3.51 ຫລຽນຯ ຕໍ່ຫຸ້ນ ເພີ່ມສູງຂຶ້ນ 78% ທຽບກັບປີກ່ອນ
- ກຳໄລຂັ້ນຕົ້ນ 39.1% ລຸດລົງຈາກປີກ່ອນຊຶ່ງຢູ່ທີ່ 40.9% ສາເຫດໜ້າຈະມາຈາກການຂາຍ iPad ຊຶ່ງເຊື່ອວ່າເປັນສິນຄ້າທີ່ບໍ່ເນັ້ນເຮັດກຳໄລສູງ
- Macs ຂາຍໄດ້ 3.47 ລ້ານເຄື່ອງສະເພາະໄຕມາດນີ້ ເພີ່ມຂຶ້ນ 33% ຈາກປີກ່ອນ
- ນັກວິເຄາະໃຫ້ iPad ເປັນປັດໃຈສຳຄັນຂອງການເຮັດລາຍໄດ້ຖະຫລົ່ມທະລາຍນີ້ ໂດຍແອບເປີນຖະແຫລງວ່າຂາຍໄປໄດ້ 3.27 ລ້ານເຄື່ອງໃນໄຕມາດທີ່ຜ່ານມາ
- ຍອດຂາຍ iPhone ລວມ 8.4 ລ້ານເຄື່ອງເພີ່ມຂຶ້ນ 61% ຈາກປີກ່ອນໂດຍຕົວເລກນີ້ລວມ iPhone 4 ຊ່ວງເປີດຕົວໄວ້ດ້ວຍ
- ມີຕົວເລກທີ່ບໍ່ດີນຳ iPod ຂາຍໄດ້ 9.41 ລ້ານເຄື່ອງລຸດລົງຈາກປີກ່ອນ 8% ແຕ່ຖ້າຈຳແນກລະອຽດແລ້ວ ສະເພາະ iPod Touch ມີຍອດຂາຍເພີ່ມສູງຂຶ້ນ 48% ລວມເຖິງ iPod ກໍຍັງຄອງສ່ວນແບ່ງຕະຫລາດອຸປະກອນຟັງເພງອັນດັບ1ຢູ່
- ແອບເປີນຄາດການລາຍໄດ້ໃນໄຕມາດຫນ້າທີ່ 18 ພັນລ້ານຫລຽນຯ ຊຶ່ງຍັງຄົງສູງກວ່າທີ່ນັກວິເຄາະປະເມີນເຊັ່ນເດີມ
ນັກວິເຄາະເບິ່ງວ່າຜູ້ລົງທຶນມີຄວາມກັງວົນຕໍ່ບັນຫາຂອງ iPhone 4 ແຕ່ເມື່ອເຫັນຍອດຂາຍແລະກຳໄລທີ່ຖະຫລົ່ມທະລາຍດັ່ງນີ້ກໍຄາຍຄວາມກັງວົນໄປໄດ້ ໂດຍຫຸ້ນມີລາຄາເພີ່ມຂຶ້ນ 3% ໃນຊົ່ວໂມງສຸດທ້າຍກ່ອນປິດຕະຫລາດຫລັກຊັບ
ສຳລັບຄົນທີ່ລຸ້ນວ່າໄຕມາດນີ້ແອບເປີນຈະແຊງໄມໂຄຊອຟົທ໌ໄດ້ຫລືບໍ່ ລໍຜົນປະກອບການທີ່ຈະອອກມາໃນວັນພະຫັດທີ່22ນີ້ ຂອງໄມໂຄຊອຟທ໌ຕາມເວລາໃນ ອະເມລິກາກັນຕໍ່ໄປ