ລ່າສຸດ ASUS ໄດ້ເປີດໂຕ PadFone ສະມາດໂຟນທີ່ປະສົມກັບແທັບເລັດ ໃນງານ Computex 2011 (ຜູ້ຂຽນເອງກໍ່ຍັງງົງວ່າມັນຈະເປັນໂທລະສັບ ຫລື ແທັບເລັດກັນແທ້). ເຊິ່ງ PadFone ຈະມາກັບໂທລະສັບຫນ້າຈໍ 4.3ນິ້ວ ແລະ ແທັບເລັດທີ່ເປັນດ໊ອກກິ້ງຂະຫນາດ 10.1ນິ້ວ ເມຶ່ອນຳເອົາໂທລະສັບໄປສຸບໃສ່ທາງດ້ານຫລັງຂອງແທັບເລັດດ໊ອກກິ້ງ ໂດຍຜ່ານການເຊື່ອມຕໍ່ຈາກສອງພອດຄື:ພອດ Micro USB ແລະ Micro HDMI ເຊິ່ງຫລັງຈາກເຊື່ອມຕໍ່ເຂົ້າໄປແລ້ວມັນກໍ່ຈະສະແດງຜົນໃນໂຫມດທີ່ມີ UI ປ່ຽນໄປເປັນແບບ HoneyComb ທັນທີໃນແທັບເລັດດ໊ອກກິ້ງ ແລະໃຊ້ງານຄືກັບ Android ແທັບເລັດທົ່ວໄປ. ນອກນັ້ນການໃຊ້ງານ 3G ໃນແທັດເລັດທີ່ເປັນດ໊ອກກິ້ງ ຍັງສາມາດໃຊ້ງານຜ່ານ SIM Card ດຽວທີ່ຢູ່ໃນໂທລະສັບໄດ້ເລີຍໂດຍບໍ່ຈຳເປັນຕ້ອງໃຊ້ຫລາຍຊິມ ເຊິ່ງແຕກຕ່າງຈາກແທັບເລັດໂຕອື່ນໆ.

ຢ່າງໃດກໍ່ຕາມລາຍລະອຽດຂອງ PadFone ນີ້ ASUS ກໍ່ຍັງບໍ່ັທັນໄດ້ເຜີຍເຖິງສະເປັກ ຫລື ບອກວ່າ ລະບົບປະຕິບັດການ Android ເປັນໂຕໃດ, ແຕ່ກໍ່ມີການຄາດການໄວ້ວ່າ PadFone ຫນ້າຈະໃຊ້ລະບົບປະຕິບັດການເປັນ Android ລຸ້ນຕໍ່ໄປທີ່ຊື່ Ice Cream Sandwich  ເພາະມັນຈະມີການຮອງຮັບທັງແທັບເລັດ ແລະ ສະມາດໂຟນ. ແຕ່ ສິ່ງທີ່ອາດຈະເປັນຄຳຖາມສຳລັບທ່ານຜູ້ອ່ານກໍ່ຄືວ່າ: ເວລາສ່ວນທີ່ເປັນແທັບເລັດນັ້ນບໍ່ມີການເຊື່ອມຕໍ່ກັບ ໂຕທີ່ເປັນໂທລະສັບ ແລ້ວມັນຈະສາມາດໃຊ້ງານໄດ້ຫລືບໍ່ ຫລື ມັນເປັນພຽງດ໊ອກ ທີ່ໃຊ້ເປັນຈໍສະແດງຜົນທີ່ໃຫຍ່ຂຶ້ນເທົ່ານັ້ນ ແລະ ຫາກໄດ້ລາຍລະອຽດ ເພີ່ມເຕີມກໍ່ຈະນຳມາອັບເດດໃຫ້ຮັບຮູ້ກັນຢ່າງທົ່ວເຖິງຢ່າງແນ່ນອນ.

ສາມາດເບິ່ງວິດີໂອເພີ່ມເຕີມໄດ້ທີ່ດ້ານລຸ່ມນີ້

ທີ່ມາ – Engadget