ມື້ນີ້ວັນເສົາທີ 28/08/2021 ໄດ້ມີໂອກາດນໍາລົດ BYD E2 ຂຶ້ນທາງດ່ວນວັງວຽງ ເພື່ອໄປທົດລອງການນໍາໃຊ້ BYD E2 ຫຼັງຈາກໄດ້ປ້າຍທະບຽນເປັນທີ່ຮຽບຮ້ອຍແລ້ວ.

👇👇👇👇👇[ສະຫຼຸບການຄໍານວນເງິນຄ່າໃຊ້ຈ່າຍທັງໝົດຢູ່ທາງດ້ານລຸ່ມສຸດ]

ເນື່ອງຈາກມີຫຼາຍຄົນແຊັດເຂົ້າມາຖາມ ເລີຍຮູ້ວ່າຖ້າຂຽນອະທິບາຍໃນນີ້ບາດດຽວເລີຍກໍ່ຈະດີ ເພື່ອເປັນຂໍ້ມູນສໍາລັບຄົນອື່ນທີ່ກໍາລັງສົນໃຈ ແລະ ລັງເລໃນການຊື້ລົດໄຟຟ້າ.

ຂໍເລີ່ມເລີຍແລ້ວກັນ, ເລີ່ມຈາກມື້ນີ້ບໍ່ໄດ້ຕັ້ງໃຈວ່າຈະໄປວັງວຽງ ເລີຍບໍ່ໄດ້ສາກແບັດໄວ້ເຕັມ ເຊິ່ງໄດ້ບັນທຶກໄວ້ແມ່ນຕອນອອກຈາກບ້ານ ໂພນໝີ (ຮ່າງຈາກສະຖານີໂພນໂຮງປະມານ 12KM) ໂດຍເລີ່ມຕົ້ນອອກບ້ານດ້ວຍແບັດ 73% ເວລາ 16:00

ຜົນການທົດລອງຂາໄປວັງວຽງ

ໃນຕອນເດີນທາງຮອດທາງດ່ວນ ການຂັບຂີ່ແມ່ນດ້ວຍຄວາມໄວ 100-120ກິໂລແມັດ ຕໍ່ຊມ ຢູ່ຕະຫຼອດເວລາຈາກສະຖານີ ໂພນໂຮງ ຈົນຮອດສະຖານີ ວັງວຽງ ໄລຍະທາງປະມານ 58KM. ການທົດລອງນີ້ແມ່ນເນັ້ນການຂັບຂີ່ທີ່ມ່ວນຊື່ນ ໄວ ແລະ ຄືກັບການຂັບຂີ່ລົດນໍ້າມັນປົກກະຕິ. ພ້ອມຍັງມີການເປີດແອເຢັນປົກກະຕິໄປພ້ອມ ໂດຍບໍ່ພະຍາຍາມຈໍາກັດຈຸດໃດເລີຍ.

ຜົນໄດ້ຮັບຄືການຂັບຂີ່ດ້ວຍຄວາມໄວ້ສູງນັ້ນເຮັດໃຫ້ລົດໃຊ້ໄຟຟ້າຫຼາຍຂຶ້ນ ໂດຍຖ້າສັງເກດຮູບຈາກທາງລຸ່ມ ລູກສອນສີແດງ ເຮັດໃຫ້ເຮົາເຫັນວ່າເມື່ອເຮົາໃຊ້ຄວາມໄວ້ສູງໃນການຂັບຂີ່ເທິງທາງດ່ວນ ເຮັດໃຫ້ເສັ້ນກຼາຟສະແດງການໃຊ້ໄຟໂດດຂຶ້ນຈາກ 11-12KW/100KM (ລູກສອນສີຂາວ) ໄປເປັນ 16-17KW/100KM (ລູກສອນແດງ). ເຊິ່ງນັ້ນເຮັດໃຫ້ເຮົາຮູ້ວ່າ ຖ້າເຮົາໃຊ້ລົດຄັນດັ່ງກ່າວຂັບຂີ່ດ້ວຍຄວາມໄວສູງຕໍ່ເນື່ອງໄລຍະຍາວ ຫລື ໃນໂຫມດ SPORT ຂອງລົດ E2 ແມ່ນຈະສາມາດແລ່ນໄດ້ສູງສຸດປະມານ ~210KM ຕໍ່ການສາກເຕັມ 100%. ຢ່າຟ້າວຕົກໃຈ, ເພາະນີ້ຄືການຂີ່ໄວ 100-120 km/h ແບບຕໍ່ເນື່ອງ. ເຊັ່ນດຽວກັບລົດນໍ້າມັນທີ່ເຮົາໃຊ້ໂຫມດ SPORT ແລ້ວຂັບຂີ່ດ້ວຍຄວາມໄວສູງເທິງທາງດ່ວນໄລຍະຍາວ ກໍ່ເຮັດໃຫ້ມີການສິ້ນເປືອງເຊັ່ນດຽວກັນ. ທັ້ງນີ້ທັງນັ້ນ 210KM ສໍາລັບການຂັບຂີ່ແບບຊິ້ງໆ ຂ້າພະເຈົ້າວ່າຄຸ້ມຄ່າຫຼາຍ.

ຜົນການທົດລອງຂາກັບຈາກວັງວຽງ

ເລີ່ມຈາກວັງວຽງເຖິງສະຖານີໂພນໂຮງ 58KM ແລະ +12Km ເຖິງບ້ານໂພນໝີ ຈຸດອອກລົດ. ໃນເທື່ອນີ້ແມ່ນຂັບຂີ່ດ້ວຍຄວາມໄວສະໝໍ່າສະເໝີໃນຊ່ວງ 90-100km/h ເຊິ່ງຜົນທີ່ໄດ້ຮັບຄືປະຢັດໄຟລົງໄປຫຼາຍຖ້າທຽບໃສ່ຕອນກ່ອນຫນ້ານີ້. ໂດຍຂ້ອຍການລາຍງານຂອງລົດເຮັດໃຫ້ເຫັນວ່າໄຟຟ້າທີ່ໃຊ້ສະເລ່ຍແມ່ນ 13KW/100KM. ອີງຕາມຄວາມໄວນີ້ເຮັດໃຫ້ເຮົາສາມາດຄາດຄະເນໄດ້ວ່າ ຖ້າຂັບຂີ່ດ້ວຍຄວາມໄວນີ້ຕໍ່ເນື່ອງແມ່ນຈະສາມາດເຮັດໃຫ້ລົດ BYD E2 ເດີນທາງໄດ້ປະມານ ~270KM ເຊິ່ງຫຼຸດຈາກເກນທີ່ທາງເກນທົ່ວໄປຂອງ BYD ປະມານ 35KM. ຢ່າຕົກໃຈ, ເພາະບໍ່ມີໄລຍະທາງໃດທີ່ຈະເຮັດໃຫ້ເຮົາແລ່ນຍາວ 270KM ດ້ວຍຄວາມໄວນີ້ຕໍ່ເນື່ອງໄດ້.

ຄໍາຖາມ: ແລ້ວ BYD E2 ສາມາດເດີນທາງໄດ້ຮອດ 305KM ຕໍ່ແບັດເຕັມ 1ຄັ້ງທີ່ທາງ BYD ແຈ້ງໄວ້ບໍ?​

ຄໍາຕອບຄືຮອດແນ່ນອນ, ຖ້າສັງເກດເບິ່ງກຼາຟທີ່ຂ້ອຍແລ່ນໃນເມືອງດ້ວຍຄວາມໄວ້ 30-40-50-60 ກມ ຕໍ່ຊົ່ວໂມງ ຫລື ຂັບປະສົມກັນ ໄວແນ່ ຊ້າແນ່ຕາມສະພາບການຈະລາຈອນ. ຈະສັງເກດເຫັນວ່າລົດໃຊ້ໄຟໄປພຽງ 10-11KW/100KM. ດ້ວຍແບັດຂອງ BYD E2 ທີ່ບັນຈຸເຕັມ 35KWH ນັ້ນໝາຍຄວາມວ່າຍອາດຈະເຮັດໃຫ້ລົດ BYD E2 ສາມາດໄປໄດ້ຮອດ 305-310KM ແນ່ນອນ. ຍ້ອນຫຍັງ? ສໍາລັບລົດທີ່ຂັບຂີ່ໃນເມືອງນັ້ນຄວາມໄວສະເລ່ຍຈະບໍ່ເກີນ 40km/h ເນື່ອງຈາກສະພາບລົດຕິດ. ຂໍ້ດີຂອງລົດໄຟຟ້າຄື ເມື່ອລົດຕິດ ລົດຂັບເຄື່ອນຊ້າສໍ່າໃດ ແຮ່ງເຮັດໃຫ້ລົດປະຢັດໄຟໄດ້ຫຼາຍສໍ່ານັ້ນ.

ຄິດໄລ່ເປັນຈໍານວນເງິນຂອງການທົດລອງເທື່ອນີ້ໄດ້ບໍ ຢາກຮູ້ຄວາມແຕກຕ່າງ?

ໄດ້, ການເດີນທາງມື້ນີ້ທັງໝົດແມ່ນ 147KM, ດຽວຈະລອງທຽບໃສ່ລົດຂອງຕົນເອງທີ່ຂັບເລີຍ Altis 2016 ຈັກ 2000cc

#ລົດ Altis 2016 ຈັກ 2000cc ຈະໃຊ້ນໍ້າມັນປະມານ ~120,000ກີບ

#ສໍາລັບລົດໄຟຟ້າ BYD E2 ມື້ນີ້ ຖ້າຕີຄ່າໄຟຟ້າທີ່ເສຍໄປໃນການໃຊ້ລົດ 147KM ມື້ນີ້ແມ່ນໃຊ້ໄຟຟ້າໄປທັງໝົດ 20.65KW ເຊິ່ງຖ້າໃຊ້ໂຕຄູນສູງສຸດ 1,019ກີບຕໍ່ 1kwh ແມ່ນຈະເປັນເງິນພຽງແຕ່ 21,042ກີບ.

ເສີມທ້າຍເລື່ອງຄໍານວນເງິນຄ່າໄຟຟ້າໃນລົດ BYD E2

ເສີມສຸດທ້າຍ ລົດ BYD ຍັງເຮັດການຄໍານວນ LIFE TIME ຂອງລົດໃຫ້ນໍາ ເຮັດໃຫ້ເຮົາຮູ້ວ່າປັດຈຸບັນນີ້ລົດຂັບໄປເທົ່າໃດ ກິໂລແມັດແລ້ວ ໃຊ້ໄຟຟ້າໄປທັງໝົດເທົ່າໃດ ເຊິ່ງອີງຈາກຮູບທາງດ້ານລຸ່ມ ເຮັດໃຫ້ຮູ້ວ່າ ຕັ້ງແຕ່ຊື້ລົດມາ ດັ່ງຮູບທາງດ້ານລຸ່ມນີ້:

• ລົດຊື້ມາຂັບໄດ້ທັງໝົດ: 603KM
• ລົດຊື້ມາແມ່ນຂັບທັງໝົດ: 25.4ຊົ່ວໂມງ
• ອີງຕາມຫົວຫນ່ວຍການກິນໄຟສະເລ່ຍ 12.8kw/100km ແມ່ນລົດຄັນນີ້ກິນໄຟທັງໝົດໄປແລ້ວ 47.1 KWh
• ສະຫຼຸບ ຖ້າຄູນຄ່າໄຟໂຕແພງສຸດ ໃນຂັບລົດ 603KM ເສຍເງິນຄ່າໄຟທັງໝົດໄປ 48,004ກີບ

ໝາຍເຫດ 1: ໃນໄລຍະທາງ 603KM ໃນລົດນໍ້າມັນຄັນເກົ່າຂ້ອຍ Altis 2016 ຈັກ 2000cc ຈະຕົກຢູ່ທີ່ 520,000ກີບ

ໝາຍເຫດ 2: ຖ້າເຈົ້າເປັນຄົນທີ່ເຕີມນໍ້າມັນລົດເທື່ອລະ 200,000-300,000ກີບ, ລົດໄຟຟ້າແມ່ນຕອບໂຈດເຈົ້າໄດ້ໂດຍອັດຕະໂນມັດ!

ໝາຍເຫດ 3:​ ຕໍ່ໄປຈະເອົາໄປທົດລອງກັບບໍລິການໂລກ້າ ແລ້ວຈະມາອັບເດດໃຫ້ຟັງ