ມື້ນີ້ໄດ້ມິໂອກາດມາອັບເດດໃຫ້ກັບຫຼາຍຄົນທີ່ກໍາລັງສົນໃຈລົດໄຟຟ້າ ຫຼັງຈາກຂ້ອຍໄດ້ຊື້ມາໃຊ້ແລ້ວ 1 ເດືອນເຕັມໆ ກໍ່ໄດ້ມີການທົດລອງຫລາຍໆຢ່າງໆໃນລະວ່າງເດືອນ ສະນັ້ນມື້ນີ້ຈະຂໍມາສະຫຼຸບໃຫ້ຟັງ

ພາບລວມການໃຊ້ງານ ໄລຍະທາງ ແລະ ຈໍານວນເງິນທີ່ເສຍໄປກັບຄ່າໄຟ

ໂດຍລວມໃນໄລຍະເວລາ 1ເດືອນ ຂ້ອຍໄດ້ໃຊ້ລົດໄປທັງໝົດ 2,534 ກິໂລແມັດ ແລະ ລົດໄດ້ຖືກໃຊ້ງານໄປທັງໝົດເປັນເວລາ 124.7ຊົ່ວໂມງ ຕາມຮູບທີ່ສະແດງຢູ່ທາງດ້ານລຸ່ມເລີຍ

ຕາມຂໍ້ມູນນີ້ເຮົາສາມາດຄໍານວນດ້ວຍການໃຊ້ວິທີຄິດໄລ່ຄ່າໄຟຜ່ານວິທີຄິດໄລ່ທີ່ຂ້ອຍເຄີຍຂຽນໄວ້ເທື່ອກ່ອນ (ໄລ່ເງິນຄ່າໄຟຟ້າສາກລົດແນວໃດ ໃຫ້ລະອຽດ ໃກ້ຄຽງ ແລະ ໄລ່ເອງໄດ້) ໄດ້ໂຕເລກການໃຊ້ເງິນຄ່າໄຟທັງໝົດປະມານ 360,000ກີບ ໃນການໃຊ້ລົດໝົດເດືອນ ໄລຍະທາງ 2,634ກິໂລແມັດ. ເຊິ່ງທຽບກັບລົດນໍ້າມັນຂອງຂ້ອຍໂດຍປະກະຕິດໄລຍະທາງນີ້ຈະຢູ່ທີ່ປະມານ 2,400,000ກີບ. ສະຫຼຸບຄືຂ້ອຍປະຢັດເງິນໄປ 2,040,000 ກີບ!!!!!

ພາບລວມການໃຊ້ງານ ແລະ ປັນຫາທີ່ເກີດຂຶ້ນ

ການໃຊ້ງານໂດຍລວມແມ່ນຍັງບໍ່ພົບປັນຫາກ່ຽວກັບໂຕລົດ. ປັນຫາທີ່ຂ້ອຍພົບສ່ວນໃຫຍ່ແມ່ນການຊາກໄຟໃນນະຄອນຫຼວງວຽງຈັນ, ເຂດຮ່ອມບ້ານທີ່ຂ້ອຍຢູ່ນັ້ນ ມີການໃຊ້ໄຟຟ້າຈໍານວນຫຼາຍ ເຮັດໃຫ້ໄຟຟ້າ ນັ້ນມາບໍ່ເຕັມທີ ເຮັດໃຫ້ການສາກໄຟລົດບໍ່ໄດ້ເຕັມທີ່ ໂດຍສະເພາະມື້ທີ່ອາກາດຮ້ອນເວລາ 7-11ໂມງກາງຄືນ. ເຊັ່ນວ່າໄຟບ້ານຫຼຸດລົງຈາກ 220V ເຫຼືອພຽງ 171V ແຕ່ນັ້ນກໍ່ບໍ່ແມ່ນປັນຫາ, ເພາະລົດ BYD ຈະສາກໄຟຕາມກະແສໄຟທີ່ໄດ້ຮັບ ໂດຍບໍ່ມີປັນກະທົບຫຍັງເລີຍກັບແບັດເຕີລີ ຫລື ລະບົບການສາກ

ນອກນັ້ນ ໃນລົດ BYD E2 ຍັງສາມາດຕັ້ງເວລາການສາກໄຟລົດໄດ້, ເຊັ່ນວ່າເຮົາສາມາດສຸບສາຍສາກປະໄວ້ ແລ້ວຮອດເວລາ 3ໂມງເຊົ້າ ເວລາທີ່ຄົນໃຊ້ໄຟຟ້າໜ້ອຍ ແລ້ວຈຶ່ງໃຫ້ລົດເລີ່ມສາກໂຕເອງກໍ່ສາມາດເຮັດໄດ້ເຊັ່ນດຽວກັນ.

ນອກນັ້ນ ໃນລະວ່າງເດືອນນີ້ລົດຂ້າພະເຈົ້າຖືກລົດຈັກຕໍາໄຟທ້າຍລົດແຕກ ດັ່ງທີ່ຫຼາຍຄົນໃຫ້ຄວາມສົນໃຈ ແລະ ຖາມມາວ່າມີສູນສ້ອມແປງບໍ? ຢູ່ລາວສູນ BYD ເພີ່ນມີສູນໃຫ້ບໍລິການ ບໍາລຸງຮັກສາ, ສ້ອມແປງ, ແລະ ມີອາໄຫຼ່ ກ່ຽມພ້ອມໄວ້ໃຫ້ບໍລິການ. ສາມາດເບິ່ງຮູບປະກອບ ແລະ ບິນທາງດ້ານລຸ່ມໄດ້ເລີຍ ສາມາດແປງຮຽບຮ້ອຍພາຍໃນ 2ຊົ່ວໂມງເທົ່ານັ້ນ ລາຄາກໍ່ບໍ່ສູງ.

ສໍາລັບຄົນທີ່ຖາມເຂົ້າມາ ມື້ນີ້ໃຫ້ຄໍາຕອບ ວ່າລົດມັນລາຍງານສະພາບທຸກຢ່າງໃຫ້ເຮົາບໍ ວ່າຂັບໄດ້ຈັກ ກິໂລແມັດ ແລະ ການຄໍານວນຕ່າງໆຫນ້າຕາເປັນແບບໃດ, ຂໍອະນຸຍາດເອົາຫນ້າຈໍການຂັບຂີ່ມາໂຊ ແລ້ວແຕ້ມອະທິບາຍເລີຍທາງດ້ານລຸ່ມ